wäutreis 1. teil

mir hei üs entschide, dasmer hie üsi wäutreis ungerbrächä.

nachemne jahr mit vilne iidrück, guete u stressige erläbnis sowi emne rucksack vou gschichtli heimer üs ufe wäg id schwiz gmacht.

ganz heimlech, ohni öpperem es stärbeswörtli ds säge, heimer üsi heireis (inkl. wohnig, outo u auem drum u dra) organisiert.

wiso simer ize zrugg cho u wi geits witer?

voräwäg: mir hei üsi reis ungloublech gnosse! jedoch hets es paar sache gä, wonis drzue bewegt hei, widr id heimat ds cho.

1. privatsphäre

mir hei mit üsem gfährt überau extrem ufsehe erregt u duurend glotzer u lüt mit vile frage um üs gha. dür das dasech üses läbe verusse abgspiut het, heimer ke rückzugsmüglechkeit gha. das isch vorauem ab zentrauamerika u ide usa massiv worde. in zentrauamerika heimer us sicherheitsgründ uf campingplätz müesse pfuse u ide usa isch wiud campe nid erloubt. es isch eis, weme paar wuche ferie macht u haut nid so privatsphäre het. weme aber so läbt us dr autag isch, wirds früecher oder speter müesam.

2. ferdy

dr ferdy isch am änd gsi. mir hätte ne müesse verchoufe oder verschrotte. e witerverschiffig ud widerinstandsetzig hätt ohni witerflüg locker 8'000 - 10'000.- kostet, was unnötig budget gmampft hätt. es neus gfährt vo ungerwägs organisiere heimer nid wöue u mitem rucksack reise isch nümm so üses ding.

3. autag

üsi reis isch gliichzitig o üse autag gsi. das heisst, das aus wome sech ir schwiz geng so wahnsinnig druf freut - sigs umsech z belohne, usem autag usbräche oder gniesse - isch eifach da gsi. was am aafang es riise highlight isch (fyrabebier, mache wasme wott, usw.) isch autag worde. me het sech nüt me müesse "verdiene". das het nachemne jahr bewürkt, dasmes eifach nümm glich wahrnimmt u gniesst wi am aafang.

4. beschäftigung

mir si beidi extremi ranggifüdli u es mues geng öppis ga. weme so reist, wi mirs gmacht hei, de chame nid au tag irgend e attraktion ga aaluege. erstens würd das ds budget spränge u zwöitens chönnt me di iidrück gar nid verarbeite. das heisst, das näbem autägleche und em sport no extreeeeem viu zit übrig isch. das schetzt me sehr u me fingt o geng wider öppis z'mache. es git jedoch nid wi imne job e uufgab oder e herusforderig. das "brucht z'wärde, öppis gschafft ha am abe"-gfüel heimer miter zit eifach nümme gha. mir brönne iz beidi druf, ä spannende job z'finge, womer chöi chrampfe u würke.

diä kontinänte womer iz no nid zäme si go entdecke, si aber nid vergässe. mir wärde üs wider es reisegfährt boue. das wärde mer im rahme vo "normale" ferie bruche u gad wäut erkunde. u wes äbe ferie si, de chöimer üs de wider uf au das, womesech im arbeitsautag wünscht, sehne u wider 100% gniesse!

so, mir freue üs mega, euch aui wider im real life u uf schwizer bode ds träffe!

ds gschichtli, wis am ferdy ergange isch, chummt ide nächste täg :-)

happy cervelats u ächts brot mit CHRUSTÄ - bis gli!